KOMUNIKADO DI PRENSA
2 maart 2023
VBC ta sostené inisiativa di “Orange Economy”manera esun di Curacao Film Score Studios
Diarason último tabatin e soft launch di Curacao Film Score Studios (“CFSS”). Esaki lo bai ta un plataforma kaminda ku tur nos kompositornan, areglistanan, musikonan, afisionadonan di músika, ets. ta úni forsa pa pone nan músika disponibel pa bende esaki den eksterior. Naturalmente esaki lo tuma lugá di un forma ku esun ku tin e derechinan intelektual riba e produkto lo ta bon protehá. E ta un lugá sentral i lo ta un wepsait kaminda e músika i komposishonnan lo ta ariba, kaminda nos Ofisina di Turismo ta haña un atrakshon adishonal a base di kua nan por promové Kòrsou. Banda di tur e kosnan bon ku nos pais tin, manera entre otro solo, santu, laman, historia, kultura pero tambe e kalor di nos hendenan, awor por promové Korsou su talentonan musikal pa wòrdu uzá komo músika pa uso den tur genero di pelíkula. Ta bon konosí ku Yu di Kòrsou tin hopi talento i kreatividat. Spesialmente den e ramo di deporte nos a bin ta demostrá esaki grandemente den e último dékadanan. Si nos kue por ehèmpel beisbol den grandes ligas, Kòrsou ta e pasi ku tin mas pelotero pa kabes di poblashon. Ku e inisiativa di CFSS awor tin un plataforma tambe pa eksponé nos talentonan musikal na mundu internashonal.
VBC ta sostené e inisiativa aki kompletamente, ya ku e tin e potenshal pa kontribuí na desaroyo i kresementu di nos ekonomia i por trigger hinter un area nobo den nos ekonomia. Te ku awor aki nos no a enfoká muchu riba e asina yama Orange Economy, kaminda servisio i produktonan tin un balor intelektual. Orange economy ta enserá hasimentu di negoshi ku ta basá riba kreatividat manera arte, kultura i músika. Esakinan ta aktividatnan ku ta forma parti di e ekonomia kreativo. Na 2013 Inter-American Development Bank a saka un publikashon indikando ku e ekonomia kreativo ta brinda oportunidatnan infinito.
Tambe e inisiativa di CFSS ta pas bon den kuadro di e National Export Strategy ku nos Ministerio di Desaroyo Ekonomiko a lansa resientemente. Manera tur hende sa, aktividatnan ku ta generá divisas ta hopi importante pa Kòrsou i e inisiativa di CFSS tin e potenshal pa hasi esaki.
VBC ta sostené tur inisiativa ku por yuda desaroya i krese nos ekonomia. Na varios okashon VBC a trese dilanti ku ta kresementu ekonómiko duradero i sostenibel ta e reseta pa saka nos for di e situashon difisil ku Kòrsou ta aden. Ku un poblashon chikitu di mas o menos 150 mil hende di kual alrededor di 60 mil ta empleá, ta sumamente difisil pa karga e nivel di enseñansa, salubridat, seguridat sosial, infrastruktura i lo demas ku nos a kustumbrá ku ne. E retonan nos dilanti ta hopi grandi i sektor privá no tin espasio pa pone mas karga riba dje. E “tax i social premium burden” na Kòrsou ta esun mas haltu den Reino, siendo ku di otro banda e entrada pa kabes di poblashon ta esun mas abou den Reino i e trend di sigur e último 10 añanan ta ku e ta bahando. Ora ku bo pone tur kos riba un rei i sinta kabes friw analisá, bo no por yega na niun otro konklushon ku mester sigui pusha pa tin un kresementu ekonomiko robusto den e añanan benidero. Awor aki ketu bai nos ta den e fase di rekuperashon ekonómiko, pasobra nos GDP ainda no a yega bèk na su nivel di 2019. Mester hasi todo por todo pa sostené inisiativanan nobo ku por kontribuí na nos kresementu ekonómiko. Mas aún si tene kuenta ku te ainda no a logra haña un operador pa nos refineria i no tin indikashon ku esaki lo tuma lugá riba termino korto.
Un punto di prekupashon grandi pa VBC ta e echo ku e “social dialogue” manera ILO ta yamé no ta funkshonando na Kòrsou. Ya pa basta tempu no tin reunion di Plataforma Tripartit ta tumando lugá. Esaki ta di lamentá, pasobra den nos mundu moderno di networking, ta huntu ku bo partnernan sosial bo tin ku traha pa nan tambe duna nan aporte i sostén pa yuda karga desishonnan.
VBC ta felisitá tur esnan ku a kere den Kòrsou i ku a tuma e inisiativa pa lanta Curacao Film Score Studios. VBC ta deseá bosnan i tur e artístanan kreativo ku a úni forsa pa hasi Curacao Film Score Studios bira un realidat, tur klase di éxito. Ojalá ku lo tin hopi mas di e inisiativanan aki pa yuda krese e bolo ekonómiko. VBC ta pará kla pa duna su aporte.
VERENIGING BEDRIJFSLEVEN CURAÇAO