2 mei 2022
KOMUNIKADO DI PRENSA di Asosiashon di Komèrsio i Industria di Kòrsou, VBC.
Kiko ta pasando ku nos Ofisina Sentral di Estadístika (CBS)?
Ta bon konosí ku e pandemia di covid-19 a okashoná un desrupshon den e kadena logístiko mundial, ku a pone preisnan subi supstanshalmente fo’i den 2021. E invashon di Rusia na Ukraïna a empeorá e situashon i pone ku preis di entre otro krudo a subi drástikamente. Esaki na su turno a pone ku preis di gasolin, gasoil, koriente i praktikamente tur otro produkto di konsumo a oumentá. E fenomeno aki, kaminda e nivel general di preis di produkto i servisio ta subi, nos ta yama inflashon. Inflashon ta pone ku bo forsa di kompra ta bira menos i si no mantene e inflashon bou di kontrol, no solamente e ta afektá bo kresementu ekonómiko, pero e por kousa ku pobresa den un pais ta oumentá. Ta p’esei gobièrnunan rònt mundu ta monitoreá e desaroyo di inflashon hopi djaserka i tuma e medidanan nesesario pa mantené esaki bou di kontrol. Varios pais ta konsiderá un inflashon di no mas ku 2% pa aña komo aseptabel.
Na Kòrsou nos ta importá praktikamente tur kos. Esaki ta nifiká ku ora preisnan subi den paisnan ku nos ta hasi hopi negoshi ku ne, por ehèmpel Merka i Hulanda, nos lo importá e inflashon ei na Kòrsou. Segun e Ofisina di Estadístika Hulandes, un prome kalkulashon di e inflashon na Hulanda pa fin di aprel 2022 ta mustra 11.2%. Na Merka e inflashon pa fin di mart ultimo tabata 8.5% riba un base anual, mientras ku e sifra di aprel ta sali dia 11 di mei benidero. Awor kon e situashon ta na Korsou? Kiko e sifranan mas resien di inflashon na Kòrsou ta bisa nos? Pa esaki VBC a aserka nos Ofisina di Estadístika, CBS. Pa nos gran sorpresa CBS no por a suministrá nos ku informashon di inflashon pa 2022. Ni sikiera pa e lunanan di yanüari i febrüari 2022. Esaki ta hopi tristu, pero bèrdat! E ta hopi tristu, pasobra CBS ta hunga un papel sumamente importante den proveé gobièrnu informashon a base di kua por desaroyá, formulá, analisá i evaluá e maneho (sosial-ekonómiko) di Kòrsou. Anto no ta pa gobièrnu so CBS ta importante, pero pa tur hende, por ehèmpel tambe pa nos hobennan ku tin ku traha riba proyekto di skol òf pa invershonístanan ku ke establesé nan mes na Kòrsou. Komo VBC nos tambe ta hasi hopi uso di informashon di CBS pa por monitoreá e situashon sosial-ekonómiko di Kòrsou, pa formulá opinion i tuma posishon basá riba informashon ofishal i konfiabel, pa por konsehá sektor komersial en general i nos miembresia en partikular. Pa VBC e ta ínaseptabel ku den e era moderno di 2022 ku su teknologia avansá, internet, social media i ku hopi organisashon ta digitalisando, ku na mei 2022 ainda nos CBS no por produsí un sifra importante manera esun di inflashon pa lunanan di 2022. Na nos humilde opinion e kolekshon di tipo di informashon asinaki mester ta algu standart i rutinario. Ta kon gobièrnu ta hasi negoshá ku Hulanda tokante por ehèmpel e redukshon di 12.5% di salario, si ni sikiera tin un indikashon kiko inflashon ta na Kòrsou. E kos aki no ta un situashon saludabel pa nos pais.
Através di e komunikado aki, VBC ta hasi un súplika urgente na gobièrnu pa dediká e atenshon nesesario na CBS, pa esaki por hasi su trabou. Ta totalmente inaseptabel ku un instansha ofishal di gobièrnu manera CBS no por demostrá ku sifras, kon e inflashon na Kòrsou ta desaroyando su mes. Mas aún VBC ta di opinion ku banda di mehorá e funkshonamentu di CBS, ta rekomendabel pa introdusí un Centraal Planbureau ku ta enkargá ku desaroyo di modelonan macro-ekonómiko, hasi scenarioplanning i “reken door” e eféktonan riba nos ekonomia di desishonnan ku wòrdu proponé. Tur esaki den un intento pa duna mas mihó sosten posibel na gobièrnu, den formulashon di su maneho sosial-ekonómiko.
VBC