KOMUNIKADO DI PRENSA
29 desèmber 2022
VBC i Minister Cijntje a tene reunion di trabou ku mira riba desaroyo di nos ekonomia den 2023.
Resientemente e Asosiashon di Komèrsio i Industria “VBC” a reuní ku Minister di desaroyo ekonomiko sr. Ruisandro Cijntje MBA pa interkambiá di idea i mira pa dilanti na 2023. E tipo di reunionnan aki ta sumamente importante pa kompronde otro mas miho i ta kuadra netamente ku e vishon di VBC pa “build bridges”. Den e vishon aki VBC ke trese partidonan mas serka di dje i asina krea mas komprenshon i union enbes di konfushon i divishon. Ku e vishon aki VBC ke enfoká mas riba e modelo di kolaborashon enbes di esun di konflikto. Den su afán pa hasi lo maksimo pa krese nos ekonomia i asina krea mas kupo di trabou i perspektiva sosial pa tur hende den nos pais, VBC a tuma nota ku ainda tin hopi malkomprondementu ta reina over di sektor priva i doñonan di trabou. E ta inkreibel pero bèrdat ku den 2022 ainda tin hopi hende ku tin e persepshon robes ku doñonan di trabou ta hendenan malbado, ku nan ta e kontrinkantenan di trahador. Ainda tin hopi hende ku tin e pensamentu eroneo ku doñonan di trabou no ke paga e trahado lokual ku e meresé, ku ta trata e trahado malu i preferiblemente ke kité mes for di trabou. Naturalmente e pensamentunan aki ta totalmente robes i no ta kuadra mas den nos mundu moderno, kaminda informashon ta un rekurso hopi importante. E doño di trabou i e trahadó tur dos tin mester di otro pa kontinuïdat di e negoshi.
VBC lo sigui ta kritiko kaminda ta trata e maneho sosial ekonomiko di nos pais i lo sigui di ta un watchdog kaminda ta trata e interes di sektor priva, pero lo hasi esaki na un manera positivo, ku kritika intenshoná pa konstruí i no destruí, pa trese huntu i no pa krea separashon. VBC ke konstruí brug o sea forga miho konekshon no solamente ku Gobièrnu, pero tambe ku sektor sindikal, publiko en general, i ku e otro asosiashonnan di komersio na Aruba, Sint Maarten i tambe Hulanda (inkluso islanan BES).
Den e reunion menshoná ku Minister Cijntje, VBC kier a tende e Minister su vishon riba kua e presupuesto di 2023 ta basá. Tambe VBC kier a interkambiá ku e Minister riba topikonan importante manera fondo di garantia i (miho) akseso na kapital di riesgo, Economic Development Board, reseshon mundial 2023 i su impakto riba nos i kon nos ta bai atende ku esaki, flankerend beleid i redukshon di “cost of doing business”. Tin ku bisa ku e tabata un bon reunion, den un atmosfera hopi positivo i den kual e Minister a ekspresá su mes hopi habrí i ku palabranan kla i raspa. Minister Cijntje a duna un exposé di e diferente plannan ku ta riba mesa variando di turismo, food security, mulina di bientu, Otrabanda, plan di rekuperashon ekonomiko, Plan Nashonal di Eksportashon i mas. No ta na su lugá pa nos di VBC bai den detaye riba esakinan, pero ta laga na e Minister mes pa hasi esaki, na su debido tempu. Punto ta, ku pa por logra su metanan i plannan e Minister tin mester di sektor priva i vise versa. Ta p’esei tambe VBC a ekspresá su deseo di ke ta mas envolví komo un partner, pa traha huntu ku Minister i Gobièrnu pa logra lo maksimo na bienestar di kresementu ekonomiko pa Kòrsou.
Por ultimo a palabra ku Minister Cijntje lo sinta kada dos luna ku VBC na mesa den 2023. VBC ta aploudí e echo ku Minister Cijntje a pone tempu disponibel pa por a reuni ku VBC komo representante di sektor privá riba un termino kòrtiku i ta gradisí e Minister pa esaki.
Nos ekonomia ta rekuperando, nos por tuma nota di esaki den e sektor di turismo, kaminda e sifranan di turismo stayover ta oumentando. Tambe for di e merkado Merikano nos a tuma nota ku e stayover-nan ta kresiendo. Pero, ainda nos ekonomia ta hopi bou di e sifra di GDP di 2019. Nos no a yega ainda, tin hopi trabou pa hasi den 2023 i e retonan ta grandi. Djis pensa por ehempel riba gastunan den salubridat publiko, situashon di CMC, fondonan sosial/SVB, desempleo haltu, un poblashon ku ta stanka na 150 mil hende i ku ta embehesiendo, “tax i social premium burden” haltisimo, entrada pa kabes di poblashon ku a bin ta baha strukturalmente e ultimo binti añanan, pero ta dor di traha huntu so nos por atende e retonan aki na un manera efektivo i satisfaktorio. VBC ta pará kla pa hasi esaki huntu ku otro partnernan sosial.
Finalmente VBC ta deseá Pueblo di Kòrsou en general un felis kambio di 2022 pa 2023 i un bon salud ku hopi prosperidat pa 2023.
VERENIGING BEDRIJFSLEVEN CURAÇAO