KOMUNIKADO DI PRENSA
17 òktober 2022
VBC a tene reunion ku Komishon di Supervishon Finansiero CFT.
Asosiashon di Komèrsio i Industria di Kòrsou, VBC a tene un reunion ku CFT riba 17 òktober último. Banda di sera konosí ku otro i splika e vishon di VBC, meta di e reunion aki tabata pa papia riba e situashon sosial-ekonómiko aktual di Kòrsou i kompartí VBC su punto di bista riba esaki. E reunion a tuma lugá den un bon atmosfera, positivo i ku e disponibilidat pa skucha otro di un forma habrí. Aunke CFT su tarea konforme e Rijkswet Financieel Toezicht ta unu di supervishon pa gobièrnu su presupuesto ta realístiko i “sluitend”, VBC ta bou di e impreshon ku CFT a kompronde VBC su mensahe. VBC ta di opinion ku pa nos sali for di e situashon aktual, tin ku enfoká muchu mas tantu riba kresementu i desaroyo ekonomiko.
Kòrsou ta konfrontando retonan grandi. Algun ehèmpel pa ilustrá:
- Nos ekonomia i sektor privá ainda no a rekuperá di e kontrakshon ekonómiko di 18.4% na 2020, kousá pa e pandemia.
- Inflashon haltu ku ta pone ku forsa di kompra ta sigui baha, kousando mas pobresa.
- Ta vislumbrando un reseshon ekonómiko mundial na horizonte i kual lo afektá nos tambe.
- E entrada pa kabes di poblashon ku a bai atras pa varios aña i ku na e momentunan aki ta esun mas abou den Reino Hulandes.
- E peso di impuesto i prima sosial ku ta esun mas haltu den nos reino i den region, tambe kompará ku paisnan riku manera Merka, Canada i Francia.
- E euro ku poulatinamente a bini ta baha na balor kompará ku e dòler Merikano i ku lo por afektá nos turismo negativamente.
- E situashon finansiero delikado di gobièrnu, kual ta pone ku gobièrnu praktikamente no ta invertiendo pa trigger kresementu ekonó
VBC su posishon ta ku tur hende i tur negoshi mester kumpli ku su obligashonnan di impuesto, konforme lei. Pero mirando e puntonan menshoná ariba, VBC no ta kere ku kontinuashon di e maneho aktual di kobransa agresivo, pa kueste lo ke kueste logra un “sluitende begroting” ta e miho remedi pa pashènt Kòrsou. Manera VBC a trese dilanti na varios okashon, e mihó remedi pa kombatí e situashon aktual ta kresementu ekonomiko aselerá, supstanshal i duradero. Pa logra esaki, gobièrnu tin ku krea e kuadro i e kondishonnan pa fasilitá i stimulá invershonnan lokal i atrae invershonistanan nobo. Saka tur likides for di nos ekonomia dor di un kobransa di impuesto agresivo, no ta kontribui na e kousa aki. Ta den e kuadro aki VBC a sinta ku CFT pa suprayá su punto di bista ku gobièrnu i Hulanda mester ta mas enfoká riba kresementu i desaroyo ekonmiko di Kòrsou. Nos mester dirigí tur nos akshonnan pa rekuperá i yega bèk na e GDP di 5.6 miljard florin ku nos tabatin na 2019 i pa di einan sigui krese di un forma duradero. Esaki lo benefisia nos tur, inkluso gobièrnu ku lo generá mas entrada.
Tin tres area konkreto ku segun VBC ta krusial pa gobièrnu dediká atenshon mesora na dje i ku lo tin un impakto positivo riba nos ekonomia. Esakinan ta:
- Lanta e Economic Development Board ku partisipashon di partnernan sosial i duna esaki e outoridat nesesario pa kita opstakulonan i bini ku inisiativanan pa desaroya nos ekonomia.
- Reformá nos sistema di impuesto pa unu mas simpel i ku menos preshon di impuesto.
- Formashon i enseñansa pa elevá nos empleadonan su funkshonamentu.
Den su diskurso durante e desayuno ku VBC a organisá na mei último, Sekretario di Estado van Huffelen a bisa ku sektor privá ta e motor pa krese nos ekonomia. Den su karta na Tweede Kamer, fechá 11 di òktober ultimo, sra. Van Huffelen ta bisa literalmente “Met name de voortgang op het terrein van het ondernemersklimaat baart de TWO zorgen”. Ku otro palabra no ta mira (sufisiente) adelanto den mehorashon di e klima di invershon. VBC ta kompartí e prekupashon aki, ekspresá den e karta di sra. van Huffelen i ta úrgi gobiernu pa sinta ku partnernan sosial na mesa i pa huntu traha di un forma dirigí riba kresementu i desaroyo ekonómiko.
Vereniging Bedrijfsleven Curaçao (VBC)