KOMUNIKADO DI PRENSA
Asosiashon di Komèrsio i Indústria di Kòrsou
VBC
Realmente Kòrsou ta komprometé na trese turista di nivel 5 strea Kòrsou?
Ku asombro i desgusto VBC a tuma nota di ekspreshonnan hasi den medionan di komunikashon último dianan, kaminda ta tilda invershonista di un risòrt renombrá den Karibe, di ta trata su empleádonan manera katibu.
Skuchando tipo di ekspreshonan asinakí, sektor empresarial ta puntra su mes ku si Kòrsou berdaderamente ta interesá i komprometé pa diversifiká i krese nos industria di turismo for di otro merkadonan, ku no ta esun Hulandes Europeo so. Pa años ta sklama ku nos mester trese turista Merikano Kòrsou, turista ku ta laga (hopi) sèn atras pa yuda krese nos ekonomia. Awor ta habri un risòrt luhoso riba nos isla, ku potenshalmente por atraé hopi turista Merikano i ta kuminsa kritikanan fuertemente, lansando grítunan populista ofensivo kontra di e invershonista, sin tene kuenta ku esaki a invertí miyones den Kòrsou. Ta asina nos ke atraé mas invershonista? Ta asina nos ke atraé turista ku ta gasta hopi sèn riba nos isla? Ta asina nos ke solushoná desempleo bou di nos propio hendenan? Ta kiko nos ta bezig ku ne? Mundu den su totalidat ta pasando dor di momentunan hopi difisil ku guera na Europa, inflashon haltu i un posibel reseshon ekonómiko na kaminda. Tur esakinan ta influenshá nos ekonomia. Nos no tin mester di krea mas empleo aki na Kòrsou? Nos no tin mester di generá divisas mas pa nos isla?
E risòrt di 5 strea en kuestion a konfrontá basta kontratiempo, pero echo ta ku e ta:
- Generá kúponan di trabou nobo pa Kòrsou i yuda baha desempleo.
- Pone ku nos hendenan ta generá un entrada pa por kria nan mes i nan famia na un manera honrado.
- Generá divisas asina ku nos por sigui paga tur lokual nos ta importá. Manera nos tur sa, nos ta importá práktikamente tur kos na Kò
- Pone ku nos hendenan por eduká i superá nan mes, dor di elevá nan forma di duna servisio pa esaki por yega nivel di “world class service”, enbes di keda chambuká semper na un nivel mediokre.
- Yuda generá mas entrada di impuesto pa gobièrnu na diferente manera.
Ta kiko nos ke na Kòrsou anto? Hyatt a bini, Hyatt a bai, ainda nos no a siña nos lès? Ketu bai nos ta sigui pensa ku ta “nan” tin mester di nos? Ku ta Kòrsou ta e sentro di mundu? Kiko ta sirbi nos pais na momentu ku sali públikamente i tilda un invershonista ku a hinka miyones den nos pais di sklabitut? No tabatin otro manera ku por a atende e asuntu ei? Di un forma no-ofensivo? No tabata posibel pa yama e departamentu di rekurso humano i/o e gerensha pa atendé kualke inkietut o dolor ku a surgi bou di empleadonan?
VBC sí ta kere ku por otro i ta kondená e tipo di ekspreshonnan hasi enérgikamente. Kòrsou no ta sirbí at all ku tipo di ekspreshonnan populista asina. Ta bon pa bisa akinan ku VBC su posishon ta ku tur hende i tur kompania, sin eksepshon mester kumpli ku nos leinan laboral. Si un kompania no ta hasi esaki, mester entregá un keho i laga e instanshanan ofishal atendé esaki. Pero no por sali kritiká, djis pa kritiká i pa kolmo na un manera basta ofensivo. VBC ta haña ku nos mester duna tur sosten na un invershonista ku a skohe pa hinka su plaka den Kòrsou, pasobra e por a bai otro pais tambe. Ta bin aserka ku ainda nos ekonomia ta lew for di yega e nivel di GDP ku tabatin promé ku e pandemia. VBC ta kere ku a bira tempu pa nos hasi un poko “soul searching” na Kòrsou i realisá ku ta nos propio aktitut ta un estorbo grandi pa adelanto di nos pais.
Na varios okashon VBC a trese dilanti ku nos tin retonan grandi pa atendé. Kon nos ta bai mantené nos sistema di salubridat publiko, nos sistema di penshún i seguridat sosial, alsa nos nivel di enseñansa i mas. Ku un poblashon stanká na 150 piku mil hende só i sin kresementu ekonómiko supstanshal i duradero, e ta bira un reto enorme. Ya nos tur por a tuma nota den un publikashon hopi resien di Banko Sentral di Kòrsou i Sint Maarten, ku e “tax burden” na Kòrsou ta hopi haltu kompará ku otro islanan den Karibe i tambe kompará ku paisnan riku manera Merka, Canada, Fransia i Hulanda. No tin espasio pa pone mas peso riba e skoudernan ku tin, pues nos mester trese mas invershonista pa yuda krese nos ekonomia. Al mismo tiempo nos tur, es desir sektor privá i sektor públiko, mester invertí den formashon di nos empleadonan pa no solamente nan desaroyá e skillset nesesario pa por funkshoná efektivo den siglo 21, pero tambe e aktitut korekto pa nos hendenan por duna servisio di nivel mundial.
VBC
14 augustus 2022