19 aprel 2022
KOMUNIKADO DI PRENSA di Asosiashon di Komèrsio i Industria di Kòrsou, VBC.
Bon desishon di gobièrnu pa baha akseins i OB riba gasolin i diesel.
Ku hopi satisfakshon VBC a tuma nota di e desishon di gobièrnu pa redusí akseins i OB, ku lo resultá den un bahada di preis di gasolin i diesel ku 24 sèn pa liter. E desishon aki ta karga ku aprobashon di VBC, mas aún mirando ku e ta kuadra ku e sugerénshanan ku VBC mes a hasi den su último komunikado di prensa, fechá 13 di mart 2022. Ojalá ku e desishon aki ser ehekutá mas lihe posibel! Pa VBC ta hopi importante pa mantené e forsa di kompra mas tantu posibel, pasobra esaki ta pone ku sèn ta keda lora i di e forma ei stimulá aktividat ekonomiko, ku ta sigui generá entrada no solamente pa empleadonan i komersiantenan, pero tambe pa gobièrnu. Si inflashon sigui subi, ku otro palabra forsa di kompra sigui baha i gobièrnu no tuma akshon efektivo, esei lo por stanka nos ekonomia i pone ku kuponan di trabou ta kore peliger. Mester evitá ku un senario asina ta bira realidat.
Kòrsou a konosé varios shòk den e último añanan ku a afektá nos ekonomia di un forma hopi negativo. Pa kuminsá e siere operashonal di e refineria, despues e siere di frontera ku Venezuela, siguí pa e pandemia ku tur e problemanan den e kadena logístiko mundial ku esaki a trese ku ne i awor e eféktonan di e invashon di Rusia na Ukraïna. Si e situashon ferfelu na Ukraïna dura largu, nos por verwagt ku preis di krudo lo sigui oumentá, ku al final lo resultá den un subida di preis pa e konsumidó final. Ta p’esei ta bon ku gobièrnu a tuma e medidanan menshoná, pa asina duna e konsumido un alivio.
Aparte di mantené e forsa di kompra, tin dos ingrediente mas ku VBC ta haña hopi importante, kual ta:
- Hasi tur lokual ta posibel pa stimulá kresementu ekonomiko di un forma aselerá. Esaki ta enserá entre otro eliminashon di tur e bareranan ku ta stroba hasimentu di negoshi, tantu pa invershonistanan lokal komo esnan internashonal. Mester bira muchu mas fásil i fleksibel pa hasi negoshi na Kò Nos no mester lubidá ku un invershonista por skohe pa bai un otro país tambe, pero nos ke pa e bini Kòrsou.
- Invertí grandemente den formashon di nos hendenan, pa nan por desaroyá nan mes i partisipá den e desaroyo ekonómiko, asina niun hende no ta keda atras. Esaki ta un tarea di tantu gobièrnu komo sektor privá i ta regardá tantu formashon den “skills” komo aktitut. Dominio di teknologia moderno ta importante den e totalidat aki.
Den esaki ta bon pa gobièrnu hiba un maneho inklusive, kaminda e ta duna partisipashon tantu na sektor privá komo otro stakeholdernan importante, pa duna nan aporte i asina yuda den formulashon di maneho.
Tin algun punto di prekupashon sí, ku VBC ta trese dilanti komo aporte, den forma di krítika konstruktivo. Na promé lugá, VBC ta sinti falta di un maneho integral, kaminda no solamente ta mantené e preis di gasolin i diesel pagabel, pero tambe e preis di awa, koriente, gas i pan. Panaderonan, kende tambe ta empresarionan importante den nos komunidat, su margen ta bou di hopi preshon i tin ku atendé ku esaki.
Na di dos luga VBC ta sinti falta di un bon kordinashon di maneho entre e Ministerio di MEO i esun di Finansas. Di un banda MEO ke krese nos ekonomia, kaminda di otro banda Ministerio di Finansas su akshonnan efektívamente ta frena kresementu ekonómiko. Si nos sòru pa nos ekonomia krese di un forma aselerá, esaki outomátikamente lo redundá den un mehorashon di nos finansas públiko i un mihó kapasidat pa por paga bèk nos debe na Hulanda. Si nada otro sosodé i nos krese nos ekonomia ku por ehèmpel 1 miljard florín, outomátikamente nos “schuldquote” tambe lo drecha.
Ainda VBC no ta sinti ku ta atendé e krisis ekonómiko ku nos ta aden, ku e sentido di urgensha nesesario. Por ehèmpel, gobièrnu (lesa Minister di GMN) ta bisa ku e proyekto di cannabis no tin prioridat, siendo ku un estudio di MEO di 2019 ta mustra ku cannabis lo por genera alrededor di 200 miyon florin na entrada pa kaha di gobièrnu i krea miles di kuponan di trabou. Un otro ehèmpel, rònt mundu ta monitoreando e desaroyo di inflashon hopi di aserka, pero serka nos te ainda gobièrnu (lesa Ofisina di Estadístika/CBS) no por bisa nos ku sifras, kuantu e inflashon na Kòrsou tabata realmente na yanüari, febrüari i mart 2022. Den nos mundu digital di awendia, esaki ta ínaseptabel.
Através di e komunikado aki, VBC ke bolbe hasi un suplika na gobièrnu, pa awor ku covid-19 ta basta bou di kòntròl, pa atendé e situashon ekonómiko ku e mesun diligensha i “crisis-management style” ku a atendé ku e pandemia.
VBC