18 aprel 2022
KOMUNIKADO DI PRENSA di Asosiashon di Komèrsio i Industria di Kòrsou, VBC.
Korekshon riba informashon eróneo ku a sali den algun medio di prensa.
Bastante asombrá VBC a tuma nota di un informashon eróneo ku a sali den algun medio di prensa siman pasá, kaminda ta insinuá ku VBC ta boga pa “448 mion euro mester bira un opsékio pa Kòrsou”. E informashon aki no ta kuadra ku bèrdat. Mas alew por bisa ku e tópiko aki ni sikiera a ser diskutí den seno di direktiva di VBC, te pa VBC tin un posishon riba esei.
Lokual sí a sosode ta ku VBC a saka un komunikado di prensa dia 13 di mart 2022. Ta bon pa tuma nota ku e komunikado aki a sali despues di e invashon di Rusia na Ukraïna dia 24 di febrüari último i e konsekuenshanan pa preis di krudo ku esaki a trese ku ne pa mundu i pa Kòrsou. Pa pone e kosnan aún mas den konteksto, ta bon pa menshoná ku VBC a emití su komunikado, despues ku gobièrnu (lesa: Minister di MEO) a tene un konferensha di prensa dia 11 di mart último. Entre otro basá riba lokual a bini dilanti den e konferensha di prensa aki, VBC a duna su komentario i hasi sinku sugerensha, dos dia despues, den su komunikado di prensa di 13 di mart. Dos di e sugerenshanan ta bisa literalmente lo siguiente:
- papia ku CFT i spliké ku e situashon di guera i subida di preis di krudo tabata imposibel pa antisipá. Konsekuentemente e situashon a kambia di tal manera ku mester hasi palabrashonnan nobo.
- konvensé Hulanda ku aunke nos ta outónomo, pa e yuda meskos ku a yuda e islanan BES, esta no ku fiansa pero ku ayudo real. Nos ta huntu den Reino Hulandes i e situashon ku a presentá su mes aki ku preisnan di krudo nunka visto for di aña 1982, ta algu ku niun hende no por a premirá, ni Hulanda mes.
Pues na ningun momentu VBC a sugerí pa kombertí ningun montante o fiansa den un opsékio.
Meskos ku varios eksperto i profeshonalnan a trese dilanti, VBC tambe ta kere firmemente ku nos mester hasi lo máksimo pa nos ekonomia krese ku pasonan grandi. Na varios okashon VBC a trese dilanti ku un kresementu ekonómiko aselerá lo yuda solushoná hopi problema ku nos ta konfrontando. Nos finansas públiko, nos sistema di seguro sosial, pobresa, desempleo, gastunan di salubridat públiko, ta algun ehèmpel di retonan ku nos ta konfrontando i ku un ekonomia floresente lo yuda solushoná.
Awor, si tin kualke akuerdo o palabrashon hasí ku CFT i Hulanda ku por afektá nos kresementu ekonómiko o forsa di kompra, sea direkto o indirekto i kual palabrashonnan a ser hasí promé ku e invashon Ruso, VBC ta di opinion ku lo ta bon pa alomenos hasi esakinan “bespreekbaar”, den kuadro di e realidat nobo ku nos ta bibando aden.
VBC ta spera di a klarifiká e punto aki.
VBC