Komunikado di Prensa
VBC ta hasi un apelashon urgente na gobièrnu pa kuminsa un proseso masivo di bakunashon.
Nos país ta pasando den moméntunan hopi difisil awor aki. Hopi negoshi a sera i tin mas ku lo sera si no yega na un fin rapido di e situashon aktual di “lockdown” ku e pandemia di Covid19 a hinka nos aden. Nos no por sinta man krusá i laga desempleo i pobresa sigui oumentá.
VBC, komo e asosiashon ku ta representá sektor empresarial, ke duna su aporte den yuda pensa riba posibel solushonnan. Awor akí ta e momentu pa nos tur komo Yu di Kòrsou uni forsa i pensamentu pa wak kon nos por saka nos país for di e situashon akí.
VBC a tuma nota for di ekspertonan ku un manera pa pone un paro na e situashon akí, ta di yega mas lihe posibel na e asina yama “herd immunity” bou di nos poblashon. Awor si esei ta e kaso, ta nifiká ku nos lo mester aselerá e proseso di bakunashon di nos hendenan. Tur esnan ku ta dispuesto na tuma e bakuna, mester por wòrdu bakuná mas lihe posibel. Den e kuadro aki VBC ke hasi un apelashon dramátiko i urgente riba gobièrnu pa start un proseso masivo di bakunashon mas lihe posibel. Si nos por asisití di kualkier manera pa logra e meta mas lihe posibel, nos ta disponibel pa hasi esaki. Un idea pa halsa e efektividat kisas ta pa hasi uzo di e konosementu i eksperensha logístiko di militarnan. Ta bon konosí ku militarnan tin hopi eksperensha den asuntunan di logístika i si gobièrnu ainda no ta hasiendo uso di esaki, kisas ta un bon idea pa nan yuda nos hinka un sistema logístiko den otro ku asina por bakuná tur hende ku ta desea esei, dentro di maksimal un luna.
Un otro idea ta pa envolví studiantenan di IFE i universidatnan médiko lokal, ku ta dispuesto pa hasi esei, den e proseso pa oumentá e kantidat di hende ku ta wòrdu bakuna pa dia. E punto ta pa nos yega herd immunity mas lihe posibel. Esaki no ta un meta riba su mes, pero mas bien pa Kòrsou por yega na un situashon normal atrobe, kaminda gobièrnu huntu ku partnernan soshal por bai dediká tempu, energia i rekursonan na stimulá kresementu ekonómiko i krea kúponan di trabou nobo. Nos ekonomia mester kuminsá krese bèk i mester krea kuponan di trabou nobo pa aliviá e situashon soshal i frena pobresa.
Tambe VBC ta pensa ku kisas mester ampliá e orario pa un hende por bakuna, te por ehèmpel 10’or di anochi. Trahadonan lo tin ku traha e ora ei den forma di shift, teniendo na kuenta ku nos leinan laboral. “Drastic times call for drastic measures”, i si nos ke sali for di e situashon difisil ku Kòrsou t’aden, tur hende mester uni forsa i demostrá bon boluntat i un grado haltu di flexibilidat.
VBC ke hasi uzo di e oportunidat aki tambe pa yama danki na Dr. Izzy Gerstenbluth i su tim di ekspertonan, na tur nos profeshonalnan den CMC i na tur otro hende ku ta laborá den e sektor di kuido mediko en general, pa e trabou heroíko ku nan a bin ta hasiendo for di aña pasá. Nos no ke ni pensa kon lo tabatá, sin nan esfuerso i dedikashon na nan trabou, tur dia di nobo. Un danki di kurason!
Vereniging Bedrijfsleven Curaçao
Persona di kontakto: Daniel Hodge – tel. 5102310