KOMUNIKADO DI PRENSA
November 3, 2021
OUMENTO DI GASTUNAN PA SEKTOR EMPRESARIAL
VBC a tuma nota di e intenshon di Gobièrnu pa di un banda subi e gastunan di sektor komersial (subi O.B.) i komunidat, pero di otro un banda kita e sosten ku tabata duna den forma di entre otro e areglo di NOW. Ta bon konosi ku e situashon ekonómiko i finansiero di Kòrsou ta hopi difisil awor aki. Tumando esaki na konsiderashon, VBC tin tur komprenshon ku kisas e desishonnan aki di Gobièrnu ta un prome reakshon outomatiko riba e situashon ku nos ta aden. Ta deseabel sí i kisas te hasta nesesario, pa atende e tipo di asuntunan aki ku tin un impakto grandi riba nos hendenan i negoshinan, den un koperashon i konsulta konstruktivo ku e otro “stakeholdernan” den nos komunidat (sektor sindikal i sektor priva) promé ku realmente hasi eskoho di e medidanan ku ta bai tuma.
VBC ta kere firmemente ku ta dor di traha huntu ku otro i tene otro bon informá so nos por saka Kòrsou for di e situashon aktual. Dor di dialogá ku otro, interkambiá di opinion i pensamentu i vooral skucha otro su argumentunan ta krea un mihó komprendementu pa otro su situashon i dolornan. Di e forma aki por tuma desishonnan ku ta mas mihó balansá i koordiná ku otro. Nos tin ku evitáa ku ta tira e kosnan bon afó, huntu ku esnan malu.
Ku esaki VBC ke hasi un apelashon i ekstende un invitashon na tur stakeholder i muy en espesial Gobièrnu, pa prome ku tuma desishonnan definitivo ku ta afektá e situashon soshal-ekonomiko di nos pais, pa laga nos drenta den konsulta ku otro, pa evaluá tur e diferente posibel konsekuenshanan, posibilidatnan i otro alternativanan, promé ku hasi un eskoho i tuma desishonnan definitivo.
Ta huntu nos tin ku sali afo.
Vereniging Bedrijfsleven Curacao (VBC)