25 yanuari 2022
KOMUNIKADO DI PRENSA
VBC no ta di akuerdo pa subi e kantidat di dia den karentena di 7 pa 10.
Sint Maarten ta baha e kantidat dia di isolashon propio di 10 pa 7 dia, pa tur hende ku ta asimptomatiko, den un intento pa yuda solushona e problemanan aktual ku personal.
Na Aruba djabierne ultimo e crisisteam a suavisa e medidanan kontra di Covid. Tur hende riba 18 anya i ku a hanya tur dos vakuna i boostershot, no tin nodi di bai mas den karentena, na momentu ku e tabata den kontakto ku un persona ku a test positivo pa Covid.
Kiko nos ta hasi na Korsou? Na Korsou nos ta hasi net kontrali. Nos ta subi e kantidat di dia pa keda den karentena di 7 bai bek 10, ku tur e konsekuenshanan ku esaki tin pa negoshinan i varios otro organisashon den nos komunidat.
VBC ta kompronde ku e kambio di 10 pa 7 dia di karentena a trese retonan logistiko ku ne, pero e ora ei mester solushona eseinan. No por ta asina ku sektor komersial i komunidat hinter tin ku bira viktima. Pakiko nos ta hasi difisil, mientras ku nos hermana islanan ta sigui suavisa? Si na Aruba i Sint Maarten por, aki tambe mester por hanya un manera tog? Si no por otro, laga nos gewoon“kijk af” for di nan anto.
E punto ta ku e periodo largu di karentena i isolashon ta pone ku organisashonnan no por duna e servisio na publiko manera mester ta. Varios negoshi mester a sea sera porta temporalmente of adapta nan orarionan di servisio, kual ta afekta e negoshi di un forma negativo. No lubida ku nos ta ketu bai den un krisis ekonomiko, kaminda ekonomia a bai atras ku 20% kompara ku prome ku e pandemia. Kasi 2 anya den pandemia a swak masha hopi negoshi i nan no por hasi un apelashon mas riba e areglonan di sosten ku tabata eksisti te ku fin di oktober 2021. Pues ta for di e angulo aki, negoshinan ta wak kon por tene nan kabes riba awa, balansando e aspekto di salubridat di nan empleadonan ku e aspekto komersial. I subi e kantidat di dianan den karentena bek na 10, siendo ku otro paisnan si ta bahando na 7 i te hasta na 5, ta inkomprendibel pa VBC.
Tin un faktor hopi importante mas, pasobra manteniendo e kantidat di dianan na 10 ta pone ku e gastunan pa SVB tambe ta mas haltu ku si redusi esakinan na 7. SVB tambe tin su retonan grandi su dilanti. Pues bahando e kantidat di dianan di 10 pa maksimal 7, gobiernu ta atende ku 2 problema den un tiru!
Si otro paisnan ta suavisando, Korsou tambe mester por. Na bienestar di nos komunidat i semper purbando na mantene e balanse entre salubridat publiko i nos ekonomia ku ketu bai ta den un krisis ekonomiko severo, VBC ta bolbe suplika gobiernu pa konsidera seriamente na redusi e kantidat di dianan di karentena i isolashon na maksimal 7.
Vereniging Bedrijfsleven Curacao