KOMUNIKADO DI PRENSA
7 di yüni 2021
VBC TA PIDI PA NOMBRA UN MINISTER DI DESAROYO EKONÓMIKO KWALIFIKÁ LIHÉ
VBC a tuma nota di e último desaroyonan rondó di formashon di gobièrnu i ta prekupá ku e manera ku kosnan ta bayendo. Dia 19 di mart último tabatin elekshon i awe nos ta kasi tres luna mas lew i ainda no tin un gobièrnu, ni tampoko tin un bista ken lo ta e próksimo minister di desaroyo ekonómiko (MEO). Tur ministerio ta importante, pero mirando e krisis ekonómiko ku aktualmente nos ta pasando aden, e kartera di ministerio di desaroyo ekonómiko ta unu hopi krítiko, huntu ku esun di finansas. I pa realisá e turnaround, nos ta supliká e partidonan envolví pa nombra un hende ku tin saber di desaroyo ekonómiko, pa por bòltu e situashon ekonómiko aktual.
Nos ekonomia a mustra un kontrakshon di mas ku 20%, kual ta ekivalente na mas ku 1 miljard florin, kompará ku 2019. Varios negoshi a sera nan porta i miles di kuponan di trabou a bai pèrdi. Ekonomia mundial ta ketu bai den gara di e pandemia, nos situashon di likides ta prekario i tin insertidumbre si nos lo haña e sosten di likides for di Hulanda. Entretantu e situashon politiko na Venezuela, kual pais histórikamente semper tabatin un impakto ekonómiko riba nos pais, a keda status quo. Den un situashon asinaki, awor mas ku nunka ta rekomendabel pa nos lidernan mustra e madures pa atende ku nos problemanan na un manera serio, responsabel i diligente. As we speak, no tin ningun indikashon ken lo ta e próksimo minister di MEO i esaki ta inaseptabel, konsiderando e situashon difisil ku Kòrsou ta den. VBC ta sinti ku mester tin mas sense of urgency pa yega na un minister ku tin e saber, kwalidades i eksperensha nesesario pa por manehá nos ekonomia. NO tin tempu pa bai purba o eksperimentá. Awe, despues di kasi 3 luna, ya mester tabatin un minister di MEO nobo kaba òf alomenos e profeshonal kla pará pa huramentá.
Komo VBC i komo un stakeholder importante den nos komunidat, sektor privá ke duna su kontribushon dor di yuda gobièrnu pensa i solushoná nos problemanan, en partikular esnan ku ta konserní nos ekonomia, finansas i sektor privá. Gobièrnu no por hasi’é su so, ta huntu nos tin ku hasi’é. E interes general di nos pais ta rekerí un kandidato ku bon konosementu i eskperensha di e materia ekonomiko i un mindset entrepreneurial pa tuma e enkargo importante pa nos ekonomia, na e momentu aki. Lo ta bon si e por yega i kuminsá traha mesora, sin ku mester tuma hopi tempu pa e werk in. Un persona ku tin un bon netwerk i ku ta mantené bon relashon tantu ku sektor privá komo sektor publiko, pero sigur tambe ku Hulanda. Awor aki no ta kumbiní Kòrsou pa nombra un hende ku no tin afinidat ku ekonomia i ku posiblemente por krea mas problema enbes di trese solushon. Laga nos tuma e eksperensha di último simannan komo “lessons learned” i sigui konstruí riba esaki pa mas lihe posibel haña un kandidato ku ta bon pa Kòrsou, unu ku ta kumpli ku tur e puntonan menshoná ariba. Ku un desempleo di riba 25%, Kòrsou no por sigui pèrde mas tempu. Ta bon pa proponé un kandidato ku ta dispuesto na duna tur ku tin pa hasi nos klima di invershon mas atraktivo i ku tin e kurashi pa for once and for all eliminá e “red tape” ku gobièrnunan di turno di ultimo 30 añanan no por a logra kita. Manera semper, VBC ta pará kla pa duna tur sosten i koperashon.
Vereniging Bedrijfsleven Curaçao