KOMUNIKADO DI PRENSA
20 desèmber 2022
VBC: sin un flankerend beleid, oumento di suèldo mínimo por resultá mas mecha ku sebu.
Asosiashon di Komèrsio i Industria “VBC” a tuma nota ku Gobièrnu ta subi e suèldo minimo entrante 1 yanüari 2023 ku 11.2%, pa ser mas eksakto di Naf 9.62 pa Naf 10.70. Manera nos a indiká den nos komunikado di prensa emití dia 7 novèmber último, VBC ta ful pará tras di e oumento aki i nos ta kontentu ku e prome stap pa aportá na un mihó porvenir pa tur Yu di Kòrsou a wòrdu tumá dor di Gobièrnu. Awor ku esaki a sosodé, nos ta spera ku Gobièrnu lo invitá e partnernan sosial mas pronto ku ta posibel pa asina dal e di dos i di tres stap pa asina por hasi e avanse aki sostenibel pa termino mas largu. Manera indiká dor di SER i Banko Sentral e ta importante pa akompañá e subida di suèldo mínimo aki ku un asina jama “flankerend beleid” mirando ku na final di dia ta ku kresementu ekonómiko por yega na un mehorashon struktural pa tur hende ku ta laborá i gana nan pan di kada dia na Kòrsou.
Ta bon konosí ku dor di e inflashon mundial, e preisnan lokal tambe a i ta subiendo supstanshalmente. Dor ku nos ta importá kasi tur kos na Kòrsou, nos ta importá e preisnan mas haltu tambe i esei al final ta bin redundá den preisnan mas haltu pa e konsumidó final. E dinámika aki, kaminda un subida den gastunan operashonal ta pone ku e preis di benta na e konsumido final tambe ta subi, ta algu masha komun i koriente den e mundu di negoshi. Asina negoshi a funkshoná tur tempu i tur kaminda.
Entre otro pa e motibu aki, i pa evitá ku preisnan ta bai subi mas haltu pa e konsumidó, VBC a proponé na Gobièrnu pa bini ku un flankerend beleid ku ta akompañá e subida di suèldo mínimo aki. Den e kuadro aki VBC a hasi varios sugerensha konkreto na Gobièrnu pa konsidera. Esakinan ainda tin ku ser analisá mas profundo pa evaluá nan konsekuenshanan. Despues ku diskutí esakinan ku partnernan sosial, lo por tuma un desishon kua di e alternativanan presentá sea dor di VBC of otro partner sosial, por tuma over pa forma parti di un flankerend beleid ku ta sostené un kresementu ekonomiko duradero. Pa e lista di e sugerenshanan ku VBC a hasi nos ta referí na nos komunikado di prensa di 7 novèmber último. Un maneho asina lo hasi posibel ku negoshinan por kumpli ku e subida di suèldo minimo, sin haña nan mes den problema riba termino mas largu òf ku nan tin ku rekurí na pasa e oumento di suèldo minimo dor den e preis di benta. Pa asumí ku tur negoshi por òf lo apsorbá e subida den nan margen di ganashi no ta realistiko, simplemente pasobra ekonomikamente e no ta posibel. Pa e motibu aki VBC ta spera di haña un reakshon of mas miho un invitashon di Gobièrnu pa deliberá, huntu ku e partnernan sosial, pa yega na un flankerend beleid mas optimal posibel pa bienestar di nos tur na Kòrsou.
Dikon un flankerend beleid?
E meta di esaki ta pa mantené e forsa di kompra i redusí e cost of doing business, involviendo e partnernan sosial den e diskushon pa jega na un situashon ku por kuminsa traha riba kresementu ekonomiko pa asina por karga tur e gastunan ku ta subi. Den e kuadro aki ta importante pa tene kuenta ku e siguiente puntonan:
- Negoshinan tambe a kaba di pasa den e pandemia ku a swak nan bastante. Hopi di nan a pasa dor di nan reservanan i awor aki ta rekuperando finansieramente. Dor di esaki hopi di nan no por hasi otro, ku no ta di hinka e subida di suèldo mínimo den nan preis di benta.
- Ekonomia for di 2010 te ku 2019 no a krese, al kontrario ela mustra un kontrakshon average di 9%. Na 2020 nos ekonomia, midí den GDP, a bai atras ku 18.4%. Na 2021 tabatin un kresementu di 4.2% i pa 2022 ta pronostiká un kresementu entre 5% pa 6%. Na 2023 ta premirá un reseshon ekonómiko mundial ku lo afektá negoshinan lokal tambe. Pues te ainda nos ekonomia falta hopi pa yega e nivel di 2019 bèk. Turismo stayover ta bayendo bon i a rekuperá. Pero e sifranan di turismo no ta “trickle down” yega na tur negoshi. Ta bon konosi ku turistanan di hotelnan all-inclusive (stay-over) no ta gasta hopi pafó di e hotel.
- E “tax i social premium burden” den nos pais ya kaba ta hopi haltu (kasi 47%) kompará ku otro islanan den Karibe, otro paisnan den Reino i kompará ku paisnan riku. Ku otro palabra, no tin espásio pa pone mas peso riba lomba di negoshinan.
- Gobièrnu su maneho di kobransa di impuesto ta mas bien enfoká riba esnan ku semper tabata kumpli kaba, kual riba su mes ta pone ku hopi negoshi ku ta compliant no tin espásio pa invertí pa por krese i drecha nan situashon kompetitivo. Esaki ta hasi’é difisil pa negoshinan por apsorbá e oumento den nan margen i alabes mester konkurí ku esnan ku no ta compliant. Sigur negoshinan kaminda tin hopi empleado ta kobra suèldo mínimo lo por haña nan mes ku difikultat.
- Dor di e preisnan mas haltu, Gobièrnu a bin ta kobra mas invoerrechten i mas omzetbelasting. E entradanan èxtra aki Gobièrnu ta uza pa un gran parti pa finansiá su propio aparato públiko i no ta pasa esaki over na públiko en general.
- Cost of doing business na Kòrsou ta hopi haltu kaba kompará ku hopi otro isla den Karibe. Esaki no ta nada nobo. VBC tin años ta trese esaki dilanti. Na momentu ku bo subi e suèldo mínimo, i sin flankerend beleid, e cost of doing business ta subi mas i nos ta bira aún menos atraktivo pa invershonista. Ta bon pa tene kuenta ku e invershonista por skohe pa bai otro isla i ta nèt esei nos no ke. Nos ke pa e bini akinan i asina yuda krese nos ekonomia di un forma aselerá i duradero.
- Ke evitá mas tantu posibel ku negoshinan ta pasa e subida di minimumloon over pa e konsumidó, dor di subi nan preis i asina krea mas inflashon.
Ta pa tur e motibunan aki VBC ta bisa ku e subida di suèldo mínimo no mester ta algu para riba su kurpa, pero mester forma parti di un maneho integral, kaminda ta redusí e posibel konsekuenshanan negativo di e subida di suèldo mínimo mas tantu posibel. Den ekonomia hopi kos ta ligá ku otro, ta interdependiente di otro. No por simplemente tuma un akshon, sin tene kuenta ku e posibel konsekuenshanan no deseá ku esaki por trese ku ne i kual Gobièrnu su propio ekspertonan i konseheronan a mustré riba dje. Esei lo no ta responsabel i segun VBC no ta kuadra ku normanan di bon gobernashon.
VBC ta enfatisá ku e ta kompletamente di akuerdo ku e subida di suèldo mínimo konforme e desishon di Gobièrnu, siempre i kuando ku esaki ta forma parti di un pakete integral inkluyendo un flankerend beleid. Esaki pa evitá ku e subida di minimumloon ta bai resultá mas mecha ku sebu. Komo tal VBC ta urgi Gobièrnu pa huntu ku partnernan sosial traha i yega na un flankerend beleid mas lihe posibel. VBC ta para kla pa traha huntu ku partnernan sosial den esaki.
Finalmente VBC ta deseá Pueblo di Kòrsou en general felis dianan di fiesta i un bon salud ku hopi prosperidat pa 2023.
VERENIGING BEDRIJFSLEVEN CURAÇAO