9 di yanüari 2022
KOMUNIKADO DI PRENSA di Asosiashon di Komèrsio i Industria di Kòrsou, VBC.
VBC ta boga pa baha e kantidat di dia di karentena i isolashon na 5.
Ultimo simannan por a tuma nota kon e kasonan di kontagio ku Covid a subi di un forma realmente espantoso. Den e kuadro aki VBC ta sostene e medídanan ku gobièrnu a tuma pa salbaguardiá nos salubridat públiko. Símplemente no por hasi otro, gobièrnu tin e responsabilidat di hasi lo máksimo pa evitá ku e kasonan ta sigui subi i pone un preshon iresponsabel riba CMC i nos sistema di salubridat.
Di otro banda VBC ta súplika gobièrnu pa no pèrdè e aspekto ekonómiko for di bista i pa aki tambe hasi todo por todo pa trata na stimulá kresementu ekonómiko i salbaguardiá kuponan di trabou. Ta bon pa semper mantené e balanse entre salubridat i ekonomia. Den e kuadro aki VBC ta rekomendá gobièrnu pa konsiderá seriamente na tuma over e rekomendashon di Center for Disease Control (“CDC”) i redusí e kantidat di dia ku mester bai den karentena òf isolashon na 5. Basá riba resultadonan sientífiko di mas ku 100 estudio den hopi pais, CDC dia 4 di yanüari último a disidí pa redusí e kantidat di dianan pa keda ful den karentena o isolashon. Ya kaba tin hopi pais ku a tuma e rekomendashon aki over, entre otro Merka, Hulanda (lesa Boneiru), pero tambe Aruba.
Tin varios negoshi kaminda hopi empleado a bira malu i mester a keda kas. Na momentu ku un empleado tèst positivo, tur esnan ku a traha huntu ku ne, tambe mester bai den karentena pa un periodo di minimalmente 10 dia. Esaki por tin komo konsekuensha ku temporalmente e negoshi of filial mester sera su porta. Pero no ta trata di e sektor komersial so, pero e ta konta tambe pa ofisinanan di gobièrnu ku ta brinda servisio na komunidat. Por ehempel hòspital, kurmentu di auto, skolnan i diferente otro servisio di gobiernu. Awor, si nos sigui mantené e kantidat di dianan di karentena na minimal 10, ta lógiko ku tur e entidatnan menshona aki mester keda será mas largu. Kada dia ku un negoshi no ta operashonal, ta swak e negoshi tambe, pasobra e gastunan sí ta keda kore, siendo ku e no ta generá entrada durante e dianan ku e ta será. Esaki konsiderando tambe ku negoshinan no por hasi un apelashon mas riba e areglonan di sostén ku tabatin, manera NOW i TVL.
VBC no ta boga pa baha e kantidat di dianan di un forma iresponsabel. Nos ta boga pa hasi esaki a base di e echo ku un instituto serio i di renombre manera CDC ta rekomendá esaki i tambe pasobra otro paísnan ku tin hopi konosementu i ku nos ta respetá i kual nos tin bon relashon ku ne, tambe a hasi esaki. E ta yuda mantené e balanse entre salubridat i ekonomia, kual semper VBC a boga p’e.
Vereniging Bedrijfsleven Curacao