KOMUNIKADO DI PRENSA
15 di yüli 2021
VBC TA SOSTENÉ GOBIÈRNU DEN SU MANEHO PA KONTENÉ OUMENTO DI COVID-19. TUR HENDE BAN BAKUNÁ!
VBC a sigui e konferensha di prensa ku Gobièrnu a tene djaweps mèrdia i por haña su mes den e desishonnan tuma. VBC ta duna Gobièrnu tur e sosten nesesario pa huntu logra dominá e pandemia aki. Espesialmente awor ku e variante Delta a kuminsa ta dominá na Hulanda, nos mester ta masha kouteloso i keda vigilá e situashon ku wowo di falki, pa por mantene e situashon aki na Kòrsou bou di kontrol.
Ta bon konosi ku VBC semper a boga pa tin un bon balanse entre salubridat publiko i e situashon ekonómiko di nos país. Tur dos aspekto ta hopi importante i tur dos meresé nos tur su atenshon. Gobièrnu huntu ku sektor privá mester hasi un esfuerso máksimo pa evitá ku nos sistema di salubridat ta hañé bou di asina hopi preshon ku e lo no por atendé ku e pandemia na un manera efektivo. Di otr’un banda Gobièrnu huntu ku sektor privá i otro stakeholdernan mester sòru pa nos ekonomia por sigui draI optimalmente. Nos no por permití ku mas negoshi ta sera nan portanan i ku kuponan di trabou ta bai perdí. Kòrsou no por permití su mes mas lòkdown, manera tabatin dos kaba den 2020 i 2021. Al kontrario, mester kwida nos ekonomia pa juist krea mas kuponan di trabou nobo. Ta p’esei tambe nos ta ful di akuerdo ku e aserkamiento di Gobièrnu pa fortalesé e kontrolnan i enfoká riba ehekushon di e medidanan eksistente.
Den e kuadro aki VBC ke hasi un yamada urgente i dramátiko riba tur su miembronan, pero tambe riba Pueblo di Kòrsou en general pa ban atené nos mes na tur e reglanan vigente, manera uso di tapaboka, laba man frekuentemente, mantené distansha soshal i lo demas reglanan. Laga nos tur ban kumpli. Laga nos tur keda bon motivá i no slèk niun momentu so. No laga kos “verwater”, tur hende tene otro skèrpi. Si nos tur duna nos granito, nos ta evitá ku mañan ku Dios ke lo mester bini ku medidanan mas severo manera por ehèmpel lòkdown, kual nos niun no ke.
Un otro punto di atenshon ku VBC ke pone hopi énfasis riba dje ta e asuntu di bakunashon. VBC a kompronde ku 86% di e hendenan ku Gobièrnu a test den e ultimo dos simannan aki, no tabata kompletamente bakuná. Es desir no a tuma tur dos bakuna. Expertonan rònt mundu a mustra a base di pruebanan sientífiko, ku bakunashon ta yuda den e lucha kontra di e pandemia. VBC ta urgi tur su miembronan i tur otro ku ainda no a bai pasa e dos bakunanan, pa bai pasa e bakuna mas lihe posibel. VBC ta urgi tur hende pa informá nan mes hopi bon, a base di informashon sientífiko i pa despues tuma e bakuna. Si nos ke bringa kontra di Covid na un manera efektivo i evitá ku mañan ku Dios ke Gobièrnu ta hañé obligá na bini ku medidanan mas severo ku ta afektá nos tur den un forma negativo, no tin mihó alternativa ku simplemente tuma e bakuna i protehá bo mes i bo sernan kerí kontra di Covid-19.
Vereniging Bedrijfsleven Curacao