KOMUNIKADO DI PRENSA
5 di mei 2021
VBC TA BOGA PA ELIMINÁ PLACHI DI DIA.
Salubridat públiko ta súmamente importante pa nos tur, punto! Ta p’esei tambe VBC, ku ta e Asosiashon di Industria i Komèrsio di Kòrsou a duna tur sostén na e medidanan di “lockdown” ku Gobièrnu a implementá 6 siman pasá. E sífranan di Covid di 6 siman pasá tabata hustifiká e desishon ei di Gobièrnu. VBC a sostené e desishonnan ei, apesar ku esakinan lo a bai kousa hopi daño na ekonomia di Kòrsou i propio miembronan di VBC, pasobra varios di nan lo no a generá niun depchi mas na entrada.
Awor aki nos ta 6 siman den lockdown i ketu bai tin e asina yamá “plachi di dia” i varios otro medida ku ta pone ku negoshinan ta sangrando. Hopi negoshi a sera nan porta kaba a konsekuensha di e pandemia i gran mayoria ku ainda ta na bida, ta den “survival mode”. Mirando kon e sífranan di Covid a baha kompará ku 6 siman pasá, VBC ta konvensí ku mester por kita e plachi di dia, p’asina negoshinan por kuminsá hala rosea bèk i haña un bida. Hopi hende ku awor aki ketu bai ta na kas, tambe por kuminsa bai traha bèk e ora ei.
Ya kaba negoshinan a pèrdè benta di Karnaval, San Valentino, Pasku di Resurekshon, Turismo en general i di krusero. Ora ku a pensa ku e siman aki sí lo por a hasi un tiki damage control dor di por a habri pa Dia di Mama, a resultá ku esaki tampoko ta posibel. Moederdag ta un dia ku ta wòrdu selebrá en grande den nos kultura, kaminda ta malkriá tur e mamanan i kaminda famíanan ta bini huntu pa selebrá ku e mamanan. Lamentablemente Gobièrnu a opta pa tene djadumingu tòg di lockdown i asina perhudikando varios rèstourant i otro negoshinan. VBC por tin komprenshon pa e desishon ei tambe, pasobra bo ke evitá ku hendenan ta bini huntu den grupo grandi riba djadumingu. Nos por kompronde esei, pero e ora ei dikon no kita e plachi di dia for di awor aki i mantené e djadumingu “autoloos”? Asina alo menos negóshinan lo por bende más den siman i kuminsá haña zuurstof bèk pa nan por biba. Voor de rest por sigui mantené e toke de keda 9’or anochi i tambe tur e otro medidanan vigente.
VBC su prekupashon ta mas e plachi di dia, ku ta sofokando hopi negoshi. Djis pa duna un idea, promé ku Covid, Kòrsou su ekonomia tabata drai mas o menos 5.5.miljard florin pa aña, kual ta nifiká mas ku 100 miyon florin pa siman! Konsekuentemente, 6 siman di lockdown, den kual hopi negoshi tabata será i ku plachi di dia na vigor, ta nifiká ku nos ekonomia sigur a pèrdè di drai varios shen miyon. Esaki no solamente ta malu pa negoshi, pero e ta malu pa kaha di Gobièrnu mes tambe. Pues ta nos tur ta sufriendo grandemente bou di e situashon aki.
VBC ta kere ku mester tin un balanse entre salubridat públiko i e parti ekonómiko. Awor aki tin un desbalanse enorme, kaminda ku sektor privá ta sali hopi perhudiká i ta sangrando profusamente. Nos tin miedu ku si no bini un kambio rápidamente, mas negoshi obligatoriamente ta haña nan ta sera nan portanan. Den e kuadro aki kisas ta bon pa hasi un komparashon ku nos hermana isla Aruba, kaminda tur negoshi a keda habrí, tin hopi turista ta drentando i nunka tabatin “autoloze zondag” ni tampoko plachi di dia, siendo ku Aruba tambe a pasa dor di momentunan sumamente difisil. Aruba a sa di manehá e balanse entre salubridat públiko i aktividatnan ekonómiko na un manera hopi efektivo i asina evitá un katástrofe ekonómiko. Ta dikon na Kòrsou sí no por? Tumando tur kos na konsiderashon i mirando kon e sífranan di Covid a bin ta baha supstanshalmente e último 10 dianan, VBC ta boga pa eliminá e plachi di dia imediatamente. Por sigui mantené tur e otro medidanan, te ora ku Gobièrnu disidí otro.
Vereniging Bedrijfsleven Curacao (VBC)